Accueil > Français > E reo tō ’u > Paripari nō Ōpōa - Taputapuātea (Hiro’a n° 107 - Août 2016)

Paripari nō Ōpōa - Taputapuātea (Hiro’a n° 107 - Août 2016)


Paripari nō Ōpōa - Taputapuātea...

« MOU’A tei ni’a, TE-A’E-TAPU
Te a’e-tapu (’e ’o) Urufa’atiu
Tū’ati nā tara e piti

Raro raro noa iho
Te MARAE VAEĀRA’I
E papa ’ei vauvaura’a
Nō nā ta’o e va’u...

-->


E reo to’u
Pu no te Ta’ere e no te Faufa’a Tumu
Texte : Hiriata Millaud pour Tahiti Tourisme/Service de la Culture et du Patrimoine.

Paripari nō Ōpōa - Taputapuātea

« MOU’A tei ni’a, TE-A’E-TAPU
Te a’e-tapu (’e ’o) Urufa’atiu
Tū’ati nā tara e piti

Raro raro noa iho
Te MARAE VAEĀRA’I
E papa ’ei vauvaura’a
Nō nā ta’o e va’u

TAHUA tei raro
MATA-TI’I-TE-TAHUA-ROA

E PAPE tō ’u e vai nei
VAI-TARA-TŌA, VAI-TĪARE
’O RO’I-TŌ-MŌANA
Hopuhopura’a nō te ’Aitō

’OUTU tei tai
MATA-HIRA-I-TE-RA’I
E PAPA tei ni’a i taua ’outu ra
Vauvaura’a nō TINIRAU-HUIMATA

Terā noa mai ra TE-AVA-MŌ’A
’Oia tei parauhia ē
TE-TAI-RAPA-TI’A
He’era’a nō ke Pape ō HĪVĀ
Hīvā i te topara’a-mahana
Hīvā i te hiti-mahana »

« ’Ei nu’ura’a tau’ati tō te fa’ari’ira’a manihini ’e tō te hiro’a »

’Ia hi’o-ātea-hia, ’o te hiro’a teie e papa faufa’a nei i te parau nō te fa’ari’ira’a manihini.
Te tāpapa nei te rātere i te māhanahana ō te rā ’e te rau-ta’a-’ē-ra’a ō te ’oto ō te manu¡K, mai iā na e hia’ai ato’a rā e ’ia tātarahia mai iā na te hō’ē ’ā’amu tumu tē fa’ahiti i te tahi parau mau.

Te fātata mai nei te tahi tūha’a ta’ahīra’a faufa’a i roto i te parau nō Taputapuātea, ’oia te terera’a mai ō te tahi ’aivāna’a nō te pū Icomos* mai, hou teie hope’a matahiti. E pū hi’opo’a ’eta’eta mau teie, i te pae ihoā rā ō te mau tāpura ’ohipa nō te ti’a’aura’a, i ni’a i te fa’anahonahora’a ō te mau patura’a, i ni’a i te vai-māoro-maita’i-ra’a ’e te vai-’atu’atu-ra’a ō te ti’ara’a tumu mau ō te hō’ē faufa’a mai teie.

Inaha, te fērurira’a ātea, tei ni’a ihoā ia i te vai-’atu’atu-maita’i-ra’a ō teie nei vāhi. ’Ua tu’i ho’i tō na ro’o rahi nā ’Ōteania tā’ato’a. E vāhi teie nō te mana, tei niuhia ’ei fa’atupura’a nō te iho tupu ō te nūna’a mā’ohi. « ’Aita e vāhi ’ē atu e noa’a ai teie mana, teie¡K’o Taputapuātea ».

Maoti te mā’imira’a ’e te tuatāpapa-hōhonu-ra’a ō te mau vāna’ana’ara’a parau pa’ari, e roa’a ai te vauvaura’a ō te ’ā’amu nō teie nei vāhi. ’Ia fa’atū’ati’atihia te mau tūha’a ō te nātura i te mau faufa’a ā tō tāhito i patu ra i ni’a i teie vāhi i te mau parau nō te faufa’a tumu haumanava, e ti’a ai.

’Ia fa’ata’ahia tō na parau, e riro ai teie vāhi i te tāpa’ohia ’e te Unesco ’ei faufa’a tumu nō te ao nei. ’Ei te vāna’ana’ara’a parau pa’ari ’e i te pariparira’a ihoā rā i te mau i’oa tumu e mātaratara ai te tahi tūha’a rahi nō teie ’ā’amu.

E mea faufa’a ’ia hēheuhia te iho ō te vā nō teie vāhi, tō na ho’i parau rahi, mai te tau ō te rahura’a ao, mai te tau ō te tahura’a vāna’a ’a tae roa mai ai i teie mahana. ’E, ’ia fa’atenihia tō na iho tumu manava ’o tei tu’i te ro’o nō tō na fa’ahiahia ’itea-’ore-hia a’e nei, ’e nō te hō’ēra’a ato’a ho’i nō vētahi ō tō na mau māna’o ’e i tō te ao ta’ato’a.
Te tāipe Unesco, e nehenehe ia e mau mai, eita rā i te mea ’aitauhia ! ’Ua ti’a roa iā rātou i te ’iritīra’a mai, i te taime i māna’ohia ’e rātou. E riro te reira ’ei fa’ahepora’a iā tātou pā’ato’a i te aupuru-tāmau-noa-ra’a i teie vāhi : te ta’ata tupu ihoā, te mau taiete fa’ari’ira’a manihini ho’i, te Hau fenua ato’a, ’e te vai atu ra ā. ’Ia riro mau tātou pau roa ’ei tū’au nō te ’atu’atura’a, nō te pārurura’a ’e nō te ha’afaufa’ara’a tau roa ō teie vāhi : e hiro’ara’a mana’o teie nā te tā’ato’ara’a ’e nō te tau roa.

’Oia nei, ’ia faufa’ahia te hiro’a, e hō’ona ato’a ai te fa’ahotura’a i te pae’au fa’ari’ira’a manihini, ’a riro ho’i ia ’ei rave’a fa’ahotura’a ’e fa’arāva’ira’a faufa’a nō Pōrīnētia farāni. Te fa’a’ite mai ra te mau numera i te ’ū’anara’a te fāito ō te mau manihini e tere māta’ita’i nei i te mau faufa’a e fāna’o nei i teie tāipe. E fa’a’itera’a ato’a te reira e te vai nei ihoā te tahi tūha’a manihini ta’a ’ē nō teie mau vāhi i tāpa’ohia ’e te Unesco. ’Ia vai ara noa rā tātou ’eiaha te manihini ’ia māni’i mai, e mano, e mano atu¡K ’a riro teie faufa’a iti tō tātou i te tū’inohia nō te rahi ō te ta’ata e ta’ata’ahī mai iā na, ’e i ’ore ho’i i roa’a iā tātou i te ti’a’au atu.

’Oia mau, ’ua tāui te māna’o ’e te hina’aro ō te manihini i teie tau. Tā na e ’imi nei, ’o te parau ia ō te iho tupu, ’o te parau ia ō te hiro’a tumu, ’o te fārēreira’a ia i te mau nūna’a i ta’a ’ē iā na i roto i te orara’a ō tā rātou mau peu ’e i tō rātou mau māna’o manava. Nō reira, e mea faufa’a ’ia rohi ’āpitipiti te mau tino ō te pae’au fa’ari’ira’a manihini ’e tō te pae’au hiro’a ; ’ia tā’ati-hō’ē-hia nā pae e piti nā roto i te tahi fērurira’a pa’ari ’e nō te tau roa. E niu papa te hiro’a nō te fa’ahotura’a ō te fa’ari’ira’a manihini ; e pou turu ato’a rā ho’i te fa’ari’ira’a manihini nō te hiro’a, nō te aupurura’a, nō te ha’afaufa’ara’a ’e nō te tūtu’ura’a i te mau tūha’a rau ō tō na faufa’a tumu, faufa’a ho’i nō te mau nūna’a ta’ata pā’ato’a nō te ao nei. ’Ei honora’a tāura iā rāua, e tere ’āpitipiti ai rāua.

Te tūha’a pa’ari roa a’e nō teie ’ōpuara’a tāpa’ora’a, te hēheura’a ia i tō na parau iho tumu ’aore e ’ite-mata-hia. ’Ua vai māoro ato’a ho’i teie vāhi i roto i te mo’emo’e tāu’a-’ore-hia, i rahi roa ai te hōpoi’a e ti’a ’ia amo i teie nei mahana nō te fa’ahiro’a-fa’ahou-ra’a iā na. Hau atu, eita teie faufa’a e nehenehe e fa’aauhia i te tahi mau patura’a tu’iro’o e vai nei nā te ara, mai te mau aora’i ari’i nō Farāni ānei. Tā tātou faufa’a, e au ’o na i te hō’ē Va’a-Hīvā i te ’ā’ano, tei natinatihia tō na mau vā ’e tō na mau mata manotini ’e te mau parau pa’ari ’e te mau peu tumu ō te hiro’a mā’ohi.

’Ei fa’ahopera’a māna’o, ’ia mānuia te tāpa’ora’a Unesco nō te tahi vāhi mai teie te huru, ’e nō te fa’a-hiro’a-fa’ahou-ra’a ō to na faufa’a tumu, e ti’a ’ia fērurihia, mai te ’ōmua-roa-ra’a ō teie nei tāpura ’ohipa tau roa, i te parau nō te ha’api’ipi’ira’a ’e nō te tu’utu’ura’a i te mau ’ite. ’A rohi itoito ana’e ia tātou nō te hēheura’a i te mau tūha’a rau nō teie nei faufa’a tumu, ’a tātara ana’e ia tātou i tō rātou aura’a mau, ’a vauvau ana’e ia tātou i tō rātou mau niu papa hau manava ’e, ’a tūtu’u ana’e ia tātou i te reira tā’ato’a i roto i te rima ō te u’i hou, ’o tā tatou e rave, e ha’api’ipi’i, e fa’aineine, e fa’ataratara nō te ’auvaha atu i tō tāua ta’ata tupu, i tēnā rātere, i terā manihini.

Inaha, rahi noa atu ā te ’ite ō te hō’ē nūna’a i tō na parau ’e i tō na faufa’a tumu, rahi noa ato’a atu ā tō na te’ote’ora’a i tō na iho tupu ’e i tō na hiro’a tumu ’e, pūai noa ato’a atu ai tō na hina’aro e pāruru, e aupuru, e ’atu’atu ’e e fa’a’ite’ite atu i tō na iho i tō te ao ato’a nei.

*Pū ti’a-rohi nō te ao nei e’ere na te Hau, e ha’a nō te vai-māoro-maita’i-ra’a ō te mau patura’a faufa’a ’e ō te mau vāhi ’ā’ai tu’iro’o i te ao nei.

- Paripari nō Ōpōa - Taputapuātea (Hiro’a n° 107 - Août 2016) (à télécharger)